Madré Marais is in 1987 in Bloemfontein gebore en word groot op ’n plaas in die Suid-Wes-Vrystaat. Sy matrikuleer aan die Hoër Meisieskool Oranje en voltooi 'n honneursgraad in linguistiek en 'n meestersgraad in kreatiewe skryfwerk, beide aan UV. Marais is ’n subredakteur vir Volksblad se Sentrale Plaaslike Koerante. Sy is die ma van een seuntjie.

 

Jaco Wolmarans is 'n vryskut-videovervaardiger, -fotograaf en -kopieskrywer. Hy woon in Milnerton.

Jen Thorpe is ’n feministiese skrywer en navorser van Kaapstad. Haar eerste roman, The Peculiars (2016), was op die lang lys vir die Etisalat-letterkundeprys en Sunday Times-fiksieprys (2017). Vorige bundels sluit in: My First Time (2012) en Feminism Is: South Africans Speak Their Truth (2018). Vir meer inligting, besoek http://jen-thorpe.com.

Arina het van kleins af 'n passie vir kos. Haar loopbaan as kosjoernalis en -stilis het in die redaksiespanne van verskeie tydskrifte begin. Sy is tans die kosredakteur van die tydskrif Landbouweekblad en ook redakteur van die gewilde kostydskrif Landbou Boerekos. Sy is die skrywer en medeskrywer van sewe resepteboeke.

Alexander Strachan is 'n bekroonde skrywer. Sy debuutbundel kortverhale, ’n Wêreld sonder grense, is met die Eugène Marais-prys bekroon en is ’n belangrike deel van die grensliteratuur. Daarna verskyn Die jakkalsjagter, Die werfbobbejaan, Agter die suikergordyn, Dwaalpoort en Brandwaterkom. Laasgenoemde is met die kykNET-Rapport Boekprys bekroon.

Johannes de Villiers is tans mede-einaar van The Hot Yoga Studio op Stellenbosch. Hy skryf al jare lank beide as outeur en as joernalis, en was voorheen verbonde aan Huisgenoot en Rapport. Hy skryf ook artikels vir Die Burger, BY en Rooi Rose.

François Bloemhof is die skrywer van meer as 40 boeke vir die volwasse, tiener- en jeugmarkte. Hy is meermalig in elke kategorie bekroon. François is 'n vryskut-taalpraktisyn en woon in Durbanville.

Elsa Winckler is ’n gewilde skrywer van liefdesverhale. Sy het al die gesogte ATKV-Woordveertjie vir romanses gewen vir Tussen jazz en rock (LAPA) in 2010, Te eenders, te anders (Satyn) in 2014, en Liefde in laslap (Satyn) in 2016. Sy woon op Bettysbaai.

Deon Meyer is voltyds skrywer en woon op Stellenbosch. Sy publikasies sluit in twaalf romans (Wie met vuur speel, 1994, Feniks, 1996, Orion, 2000, Proteus, 2002, Infanta, 2004, Onsigbaar, 2007, 13 Uur, 2008, Spoor, 2010, 7 Dae, 2011, Kobra, 2013, Ikarus, 2015 en Koors, 2016). Orion, Proteus en Infanta is met die ATKV-prosaprys bekroon.

Dana Snyman is ’n bekroonde en geliefde skrywer met ’n rits topverkopers agter sy naam. Sy TV-reeks, Op pad met Dana, is uiters gewild. Die vierde reeks het in April 2019 begin. Hy het meer as 25 000 volgelinge op Facebook, waar hy van sy aweregse, ontroerende stories deel, dikwels met oorweldigende reaksie van lesers.

Christine Ferreira is die redakteur van die vrouetydskrif Lééf. Sy tree ook dikwels op as spreker. Vantevore was Christine deel van die tydskrif SARIE se redaksie, waar sy vir bykans tien jaar skoonheidsredakteur was. Christine woon in Johannesburg en is getroud met Johan, 'n pastorale sielkundige.