NEEM HIER DEEL AAN ONS BLOKRAAI-KOMPETISIE

Wat het Elsa Joubert se Spertyd, Pieter W. Grobbelaar se Jakkals en Wolf en Fatima Sydow en Gadija Sydow Noordien se Kaap, kerrie en koesisters gemeen?

Hierdie boeke is almal op NB-Uitgewers se lys van 30 Afrikaanse boeke wat vanaf begin Mei teen ’n ekstra spesiale prys verkoop gaan word ter viering van Afrikaans se 100-jarige bestaan as amptelike taal en selfs nog langer as algemeen gesproke en geskrewe taal.

Om die amptelike erkenning van Afrikaans op 8 Mei 1925 te herdenk, skop NB se “wees wakker, soek die geel plakker!”-veldtog vanjaar op 8 Mei af. Lesers kan in boekwinkels op die uitkyk wees vir dié Afrikaanse boeke wat met ’n heldergeel plakker gemerk is.

 As deel van die veldtog is vier publikasies wat nie meer in drukformaat beskikbaar was nie ook herdruk. Dit sluit in Eilande deur Dan Sleigh, Plaasmoord deur Karin Brynard, Nathan Trantraal se digbundel Chokers en survivors en Marlene van Niekerk se Triomf.

Die veldtog duur vir die volgende drie maande en ander aktiwiteite wat beplan word, behels kompetisies waarin boeke weggegee gaan word en ’n voorlesing uit Jakkals en Wolf deur Sinoa Musa, ’n leerling aan die Pionierskool vir Blindes in Worcester. ’n Opname van die voorlesing sal op NB se sosiale media-platforms gedeel word, asook blokraaie gebaseer op die lys van 30 boeke en humoristiese plasings uit Pharos se Spreekwoorde en ander segswyses, wat ook op die lys is.

Dan gaan die skrywer Olivia M. Coetzee een van die sprokies uit Marita van der Vyver se Die mooiste sprokies van Grimm in Kaaps omsit. Dit sal ook op sosiale media-platforms gedeel word.

“Daar is geen beter bewyse van hoe lewendig en sterk Afrikaans is nie as die reuse-aantal boeke wat jaarliks in Afrikaans uitgegee word en die feit dat soveel van hierdie publikasies op die topverkoperlyste boer,” sê Annie Olivier, hoofbestuurder van NB-Uitgewers. “Met hierdie spesiale aanbieding wou ons iets doen wat hopelik ’n huppel in Afrikaanse boeklesers se stap sal bring.

“Ons vier die taal waarin ons opstaan en gaan slaap, lag en huil, droom en nadink – ons vier Afrikaans in haar rykheid en veelsydigheid.”