Daar is geen kleedrepetisie om ons voor te berei vir die lewe nie. Soms verg dit net een krisis om ons lewe vir altyd in ‘n nuwe rigting te stuur. Sal daardie een groot terugslag my verbitterd en verwese laat? Sal my geloof permanent in trurat gegooi word? En wat van die suksesse? Sal onverwagse deurbrake my in ‘n arrogante wese verander? Dit is in sulke onverwagse oomblikke dat die ware helde van die lewe gebore word. Hulle is doodgewone mense wat weier om die knie te buig voor daardie een groot terugslag. Hulle kies om stroomop te beur, teen alle teenstand in. Hierdie egte helde van die lewe is daardie klein bendetjie wat God se hand op ‘n nuwe manier in die donker raakvat. Hierdie mense se verhale word in hierdie boek eerstehands gedeel. Hulle roetes is aangrypend, besielend en gewoon dapper. Hulle lewens vertel luidkeels dat onverwagse slegte of goeie dinge nie die laaste sê oor ons het nie. Ware karakter wys midde-in die storm, daar waar pyn en oordaad deur gewone individue omskep word in nuwe genaderoetes. Daardie een dag wat totaal anders was in hulle lewe het hulle toe nie platgeslaan nie. Dit het hulle juis geïnspireer tot nuwe hoogtes.