Drie aangrypende liefdesverhale, saamgevoeg in een omnibus. In Sê groete vir Pappa bedank Reino Vos as predikant toe sy vrou, Chrisma, hom verlaat. Hy word hoof van die Sonop-kinderhuis en kom weer in kontak met Rita Venter, gewese vrou van die man saam met wie Reino se vrou weggeloop het. In ’n Malva in Vinkelstraat word dominee Werner gul deur sy eerste gemeente op Wilgersdrift verwelkom. Maar dit is dieselfde mense wat gou-gou soos een man teen hom draai. ’n Dorp soos Wilgersdrift vergewe nie maklik nie, veral nie as ’n buitestander hul ongeskrewe reëls oortree nie. Lisé, Ena Murray se heel eerste roman (in 1960 geskryf), is die verhaal van ’n bedorwe rykmansdogter wat uitvind dat sy besig is om blind te word. Aanvanklik wil sy niks weet van haar dokter se voorstel dat sy op ’n vriend van hom se plaas gaan bly tot sy haar gebrek leer aanvaar nie. Maar wanneer die wêreld finaal om haar verdonker, laat sy toe dat dokter Justus haar na Uitvlug neem.