GROOT AFRIKAANSE ROMANWEDSTRYD WENNERS 2021

21 March 2021

Die wenners van NB-Uitgewers se Groot Afrikaanse Romanwedstryd is pas aangekondig.
Die eindbeoordelaars was Valda Jansen, Alida Potgieter en Herman Wasserman.

Die wenners in die kategorie vir gepubliseerde skrywers is: 

Derde prys: Eugene X deur Kirby van der Merwe
Tweede prys: Die getuienis deur Francois Smith
Eerste prys:  Simoelégri deur Jaco Fouché

Oor die wenners skryf die beoordelaars:

Derde prys
In Kirby van der Merwe se Eugene X (Human & Rousseau) is die manlike hoofkarakter ’n middeljarige vryskutjoernalis. Hy doen verslag oor groot misdaadstories uit die onlangse verlede, soos die Skierlik Skieter en die Modimolle Monster. Terselfdertyd doen hy in die roman aan die leser “verslag” oor sy eie rol in – en ervaring van –geweldsmisdade. Hier word ’n ervaringswêreld aan bod gebring wat nog veels te min in Afrikaans ontgin is. Sowel die geweld van apartheid as die stryd daarteen word in herinnering geroep en die roman maak ’n belangrike bydrae tot nuwe insigte in die wonde van die geskiedenis wat steeds leef in die bewussyn van die meerderheid van die Afrikaanse taalgemeenskap. ’n Vergange era word vir die nageslag vasgevang voor dit in die vergetelheid verdwyn. Die “taal van die ou dae” wat in hierdie storie verlewendig word, bring ’n verryking van die Afrikaanse letterkunde

Tweede prys
In Francois Smith se Die getuienis (Tafelberg) doen ’n egpaar afwisselend verslag oor hul belewenisse en reaksies wanneer hulle met te min geld en slegs in geloof ’n reis moet onderneem na die grootwordwêreld van die man. Hulle is betrokke by ’n fundamentalistiese geloofsgroep wat letterlik volgens Die Woord leef, en hul geloof rig dus al hul besluite. ’n Aangrypende en menslike roman met karakters wat dikwels baie verskillend reageer op gebeure – die motiverings vir hul optrede word eerlik dog sensitief ontgin. Onder meer is dit indrukwekkend hoe die skrywer die kwessie van mense se geloofsoortuigings (hoe naïef of stiksienig ook al in die oë van die leser) aanbied en hanteer sonder implisiete kritiek of morele oordeel. Die taalgebruik, register en idioom word deurgaans besonder goed volgehou. ’n Roman met fyn emosionele trefkrag en integriteit.

Eerste prys
Jaco Fouché se Simoelégri (Human & Rousseau) is ’n enigmatiese, fassinerende roman oor marginale karakters wat hulself en mekaar probeer vind in ’n postapokaliptiese verstrooiing. Die verhaal is terselfdertyd verbeeldingryk en vreemd, maar tog duidelik herkenbaar in die manier waarop aktuele sosiale en politieke kwessies aangesny word ­– ’n tipe toondig vir ons tyd. Die ek-verteller, Lady Die (oftewel “Dame Dood”), is transgender en woon in ’n verlate ou kerk in die armoedige en gevaarlike fiktiewe enklawe, Simoelégri. Melankolie en besinning word afgewissel met humor en die rol van godsdiens, oftewel ’n soort spirituele soeke na ’n sinvolle bestaan, word belig. Die struktuur, milieu en verhaallyn is weldeurdag en daar is iets elegies aan hierdie vertelling, met die werklik gesaghebbende, wyse, filosofiese stem van ’n ervare skrywer aan die woord. ’n Waardige wenner.

Publikasiedatums is:

Derde prys: Eugene X deur Kirby van der Merwe (Maart 2022)
Tweede prys: Die getuienis deur Francois Smith (Augustus 2021)
Eerste prys:  Simoelégri deur Jaco Fouché  (Julie 2021)

*Titels en publikasiedatums mag verander.

Besturende Direkteur - Media24-Boeke, Eloise Wessels: “Ons was verheug deur die groot aantal inskrywings wat ons vir die Groot Afrikaanse Romanwedstryd ontvang het en was veral ook in ons skik met die gehalte van die inskrywings.  Dit is daarom vir my ’n besonder groot plesier om die drie wenners van harte geluk te wens.  Ons sien baie uit daarna om julle boeke uit te gee en veral om hulle te lees!”

Vir medianavrae, kontak Eben Pienaar by [email protected]