Kinders met goed ontwikkelde Emosionele Intelligensie
- se gesondheid baat daarby
- presteer akademies beter
- kom beter oor die weg met vriende en familie
- is minder geneig tot geweld
- herstel makliker van terugslae en is gelukkiger.
Hulle is ster-kinders wat geleenthede ten beste benut en die meeste maak van wat die lewe hul bied.
Gelukkig is Emosionele Intelligensie ’n vaardigheid wat aangeleer kan word. En, soos ’n spier, kan jy daaraan werk en dit met oefening verbeter.
Dié boek verskaf, naas agtergrondinligting en wenke, ook hope praktiese aktiwiteite waarvan ouers en onderwysers gebruik kan maak om kinders van alle ouderdomme te help om hul Emosionele Intelligensie te verbeter – en om so hul volle potensiaal te verwesenlik.
Die 68 aktiwiteite, toegespits op verskillende ouderdomsgroepe, is pret om te probeer en is spesiaal ontwerp om kinders speel-speel te leer hoe om hulle gevoelens te identifiseer en uit te spreek. Dit lei na goeie kommunikasie en help kinders voel dat hulle in beheer is van hulle emosies, nie slaafs daaraan uitgelewer nie. Hulle leer om waagmoedig te wees en om terugslae as deel van die lewe te ervaar. Kinders leer bowenal om hulself en ander te aanvaar soos hulle is.
