Die maklik begaanbare weë hou vir Johan Bakkes geen aantrekkingskrag nie; nee, vir hom altyd maar die weë wat met bloedsweet gepaardgaan. Dáár waar min ander dit nog gewaag het. Mettertyd bied Nepal, Pakistan en Ethiopië net nie meer genoeg van ’n uitdaging nie, en dan neem jou reise jou na toenemend vreemde plekke, daar waar die gewone toeris nie gaan nie, daar waar die plaaslike inwoners net hul eie taal verstaan. Norrevøk, so wil gerugte dit hê, is ’n klein dorpie anderkant Novisibirsk in Siberië. Daar waar dit regtig koud raak, soos in minus 40 grade. Maar as jou van Bakkes is, is die woord norrevøk min of meer sinoniem met “nooit boedel oorgee nie”. Heerlike, avontuurlustige vertellings, propvol humor, en nooit sonder deernis vir die medemens nie.