Liefka, ’n materialistiese jong stadsvrou, verloor haar werk, raak depressief en woon ’n ­lewensverrykingskursus by. Daar word die volgende “lewenswysheid” by haar ingedril: “Ek is waar ek is en dis perfek.”
Of ís dit?
Coetser was blykbaar nie in­genome daarmee dat haar eerste twee boeke “chick lit” genoem is nie. Op ’n webwerf beweer sy ewe laf dié genre “handel glo hoofsaaklik oor inkopies, veral ­skoene, en geen karakter in my boek koop enigiets nie.”
In Aan die Windkant begeef haar karakters hulle wel soms by winkels in. Is dit Coetser se ­manier om te sê sy het haar berus by die “chick lit”-etiket? Waarskynlik nie. En dalk verdien Coetser dat een van haar pennevrugte as “sommer net ’n storie” gelees en beoordeel moet word.
Liefka vestig haar op die ­platteland en durf ’n nuwe lewe aan, maar sy het emosioneel nog nie klaargespeel met die ­seksuele teistering wat tot haar bedanking gelei het nie. Ook nie met die minderwaardigheids­gevoel waarmee sy worstel ­omdat haar chauvinistiese pa haar emosioneel onderdruk het nie. Sonnies Sonnekus kom op die toneel. Daar is dadelik ’n ­seksuele vonk?.?.?. maar het Faure Fourie ook sy oog op haar?
Liefka verloor haar hart op ’n vigswesie en raak betrokke by ’n klein, informele weeshuis. Boonop word sy by haar ouers se ­dreigende egskeiding ingetrek.
Om alles erger te maak ontdek Liefka sy het ’n seldsame siekte wat veroorsaak dat haar vagina haarself “kannibaliseer”.
Die skrywer verdien ’n goue sterretjie omdat sy soveel balle in die lug hou en elke dilemma tot ’n bevredigende oplossing bring. Want “Ek is wat ek is en dis ­perfek” is onsin. Daar moet ­karakterontwikkeling plaasvind; dinge moet gebéúr voordat die gordyn kan sak.
Aan die Windkant is ’n knap stukkie werk, popsielkunde en al. Coetser skryf onderhoudend, met humor en deernis. Maar dit pla juis dat sy soveel gewigtige ­temas gelyk takel, sonder ’n ­spesifieke storielyn waarop daar verál gefokus word en wat die verhaal dra.
En hoekom voel dit asof ek die boek meer sou geniet as ek dit uit die staanspoor as “chick lit” gelees het?
TAFELBERG-UITGEWERS, KAAPSTAD. (SAGTEBAND, 224 BLADSYE, ISBN 9780624047797.)
Jaybee Roux is ’n skrywer van Velddrif.

Read more...